Masalay

Masalay,Ampatuan,Maguindanao

Malaparaiso ka kung tingnan

Napapalibutan ng luntiang kabundukan

Datapwat kabahagi ka rin

Ng lupaing ninuno ng mga tribung Teduray-Lambangian

Napakalawak ng abot ng paningin

Habang nakatayo sayong bulubundukin

Tila hinihele sa mapang-akit na sayaw ng mga talahib

At malamig na samyo ng hangin-

Subalit noong Nobyembre 23,2009

Pinunit ang iyong katahimikan-

Ng mga hiyaw at palahaw ng pagsusumamo

Ng ratatat ng mga makapangyarihan na armas

Ng mga saksak na tumatagos sa malambot na laman

Na hatid pawang walang kasintinding sakit

At kamatayan

Katawan dito.

Katawan doon.

Ng mga peryodista,brodkaster,mamahayag,abogado,

ina,ama,asawa,kapatid at anak

Walang awang pinagtatapon.

Ibinaon.

Karumal-dumal na krimen

Pilit pinagtakpan

Ng mga buwitreng

Nag-aastang panginoon

Kaya-

Paano ko titingnan

Ang iyong kabundukan

Na hindi marinig alingawngaw

Kanilang mga hiyaw?

Paano maibalik

Dating katahimikan

Ng iyong lambak

Gayong naririnig impit nilang iyak?

Paano lalakad

Sa iyong makitid na daan

Habang nakikinita

Hilakbot sa kanilang mga mukha?

Paanong hindi mangingilabot

Tuwing maririnig

Indayog ng mga talahib

Samantalang naaninag katawan nilang nanlalamig?

Paanong hindi mabibingi

Sa katahimikan

Dahil balot nito

Hiyaw ng mga kaluluwang tumangis ng katarungan?

O Masalay!

Ilang beses ka na kaya

Naging piping saksi

Ng pagkitil ng buhay

At tahimik na nanangis

Sa bawat patak ng dugo

Na dumilig sa iyong luntiang paligid.

5 Mayo 2010, Kutang-bato

10:30 ng Gabi